Monday, June 27, 2011

Justin Bieber : Macy Dawr Hmaiah An Nam


Dawrthil cawmi hna le lam aa chawkmi hna he buai nawnmi a ummi New York Khualipi laifang um Macy Dawr ah midang kal kho lo dingin an khamnak hri zaammi pah in upa pakhat nih Justin Bieber cu a nam tiah 23/6/2011 ni ah thawngpang a chuak. Kum 17 simi “Baby” hlasa Justin Bieber cu dawr lengah a van chuak bak ah palik nih mi he cawh lo dingin lam an kham piak ko bu ah an khamnak lonh in mi pakhat nih vawlei ah tlu lakin a nam tiah a hmutu hna nih an chim. Hi Macy timi dawr ah Bieber cu “Someday” zihmui caw-ngia aa thla i a ṭin lei ah hi bantuk thil a ton hi a si. Amah minung tu cu zeihmanh aa khong lo. Palik nih a namtu pa cu an hei dawi i lamṭe inn pawng pakhat ah an tlaih khawh i atu hi New York Palik zungah an chiah ko. – Online

US Fitlaw Clooney cu A Nungak he lam an i ṭhen ṭhan


Hollywood fitlaw vialte lakah mi lung a la bik khotu lakah pakhat aa tel vemi George Clooney cu kum hnih chung a komh cangmi Italian miphun a nungak Elisabetta Canalis he an i ṭhen cang. “Kan nih pahnih cu kan i duh kho ti lai lo. Kan i ṭhennak hi pumpak ruangah le chim a har deuh ruangah nan zapi te nih kan pumpak sining kong ah nan kan theihthiam lai ti ruahchannak kan ngei ko” tiah an pahnih tein Cacawn Nithumni ah an chuahmi People Magazine ah an chim. Kum 50 a si cangmi fitlaw cu People Magazine nih 1997 ah an tuahmi “Sexiest Man Alive”a rak ngah. Amah cu 1989 – 93 tiang fidi Talia Balsam he an rak i um bal.

“Atu an i ṭhennak kong he pehtlaiin keimah zong zeihmanh chim lo dingin Elisabetta nih a ka ti. Thawnglatu pawl sinah amah pumpak in fianternak tuah khawhnak dingah caan tlawmpalte ka pe rih ko a ka ti” tiah kum 32 a simi Canalis hrang i biachimnak nawl a ngeitu pa zong nih a chim. – AFP/The Star

Editor Hmurka ( Seihnam: 484nk)

Kan ram ah ramchung ral a tho. Kachin miphun an in-tuarmi kong ruah tikah lung a fak hringhran. Nihin ni tiangah Kawl ralkap nih Kachin nu an tlaihhrem cangmi hna nu 18 renglo an si cang. Hi dirhmun tiang an phakmi kong ruah tikah Kachin miphun caah zeitluk in dah an lung a fah lai i, an ngeih a chiat lai tihi ruah awk a ṭhalo. Chin miphun nih hi bantuk dirhmun hi tong ve usihlaw zeitin kan ruah cio hnga? Kachin mipi an lung aa rual ee, kan rak timi lengmangmi hi an miphun chungah an intuarmi nih lungrualnak le lungfahnak a rak chuahpi caah a rak si bik ko rua.

Kachin ram i kahnak cu a dai rih lo. Kawlram chung hmun zeimawzat ah Bom a puak ti a si. Cozah thar an kai hnuah ṭhatlei cu chim lo thisen tu a luang. Daw Suu zong khualtlawn ding in timhtuahnak a ngei. Ramchung i kahnak kongah NLD party zong nih chimrelnak a ngei lo ti a si. Kachin ramkulh ah a cangmi ruangah ramzakip ummi Kachin miphun lungrualnak a chuahpi. Kachin ram ral daihnak dingah thlazacamnak in bawm cio hna usih.

Malaysia, Kawlram Palai Zung ah Kachin ralzaam nih duhlonak an langhter



Kachin ramkulh ah Kachin hriamtlaibu (KIA) le Kawl ralkap i kahnak cu nihin ni tiang a daih rih lo caah le Kawl ralkap nih Kachinram mipi cungah harnak an pekmi hna a karh chin lengmangmi kong he pehtlai in Malaysia Kachin ralzaam 200 leng nih Kawlram Palai zung ah Kachin thilthuam tling i hruk in duhlonak an langhter.

June 24 ni ah Kawlram palai zung pawngah Kachin ralzaam 200 leng cu a bu in duhlonak le biachimnak ngei ding in timhtuahnak ngeih a si. Zinglei sml 9:30 in Kachin ralzaam an umnak cio in Bus 4 in an ra cio hna. Kawlram Palai zung ralchan deuh ah mi an i hngah lioah Malaysia Palik nih khoika hmanh kalnak nawl an onh ti hna lo. Mi an tlin hnuah Palai zung hmai ah biachimnak le an i kenmi ca pawl thlirnak kan tuah lai an ti nain nawlngeitu palik nih kalnak nawl onh loin an ti hna. Minutes 5 lawng caan kan lak lai tiah Kachin ralzaam hruaitu pakhat nih Palik pawl a nawl hna nain nawlonh a si lo. An kut in cathlir ding le Kachin Alan pawl an i ken. Ca an i kenmi tampi hna lakah, Stop War, Free Burma, tbk catar pawl i put in upa, mino, ngakchia ti loin lamkam ahcun minute 20 renglo caan an hmang kho. "Palik nih zeihmanh tuahnak nawl a kan onh lo. Palai zung hmai biachimnak zong an kan pe lo. Nain ca tu in chia uh an ti, ca tu cu kan pek khawh hna," tiah Kachin hruaitu pakhat nih a chim. Palik le CID nih biatak in an kan um hnawh caah zei hmanh kan tuah kho lo, tiah a chimchih. Malaysia ram ah Kachin ralzaam hi thong 4 in thong 5 kar hrawng an um, tiah theih a si.

Thantlang Sibawi Dawhcah-lo an Thial Cang


Thantlangpeng Siibawipa Dr. Thet Tun Nwe cu khuami nih miziachia le ei-hmuar hmang a si ti in an caihphaimi a si i atu cu Sagaing ramṭhen Shwebo ah an ṭhial ti in Chinlandguardian thanhca nih a ṭial. A rianṭuanhawi sii sayamate le mizaw pawl nih voi tampi an ripawt hnu lawngah ṭhial an timh hi a si.

Khuami pastor pakhat chimnak ah, “Dr. Thet Tun Nwe aa ṭhialnak siizung hi thinghmui siizung ah a si i, aleeng in tangka hmuhnak a um ding a si lo caah ṭhialnak order ca a chuahnak a sau cang nain, Thantlang ah aa benh peng ko” tiah a ti. Mah Kawl siibawipa cu a haakkauh tuk ruang ah amah bawmtu sii sayamate cung le mizaw cung ah zaangfahnak ngei lo le minung lungthin a kenglomi michiahru a si ti in an chim. Mah sibawipa nih cun, sii sayamate pawl kha khuate ah khualtlawnnak man TA peek lo in a kalter hna i, Thantlangpeng khuatelei ca i peek ding sii-ai lei bawmhnak phaisa vialte cu amah zal chung ah aa sanh dih ti in, naihniam hmutu pakhat nih a phuan. “Kan hnu naite ah khan, a hmai ah hliamhma a tongmi khuami pakhat cu a hma an ṭhitpiak man lawngah K80,000 a laak hna ti a si. Mah hma ṭhit hmanh cu amah nih a ṭhi lo, sii sayamate nih an ṭhitpiak, “ tiah mithmu pakhat nih a chim. Mithmu khuami tampi zong nih an chimmi cu, mah sibawipa nih hin, nau ngei ding nu pawl hi, nau ngeihter zokzok loin sizung ah zankhuadei hraam lengmang in a chiah hna. I, zoh bak loin a chiah chel hna zong a um ti a si. Khua upa pakhat nih Khonumthung News sin i a chimnak ah, cunglei nawlngeitu nih hin Dr. Thet Tun Nwe hi a ziaza dawhcah-lo ruangah Laitlang ah an hun ṭhialmi a si ti a si. Mah cancan an chiah ruangah nawlngeitu pawl sin ah khuami le sizung rianṭuantu nih atu le atu an ripawtnak kha an hna an i cheh a sau tuk ti in an mawhchiat hna.

“Atu cu aa ṭhial ding a si cang caah kan hna a thiang tuk cang. Asinain, amah zaka ah aho dah an hun chiah te lai ti cu kan fiang kho rih lo. Miṭha le zaangfahthiam sibawi an hun chiah nak ding ah thla kan cam,” ti in laihlum pakhat nih Chinland Guardian sin ah a chim.—Chinland Guardian.

Chin ralzaam 2500 leng nih New Delhi khua ah lamzawhnak an ngei


India ram New Delhi khua chungah Chin ralzaam 2500 leng nih anmah ralzaam kong he pehtlai in biatak deuh in zohkhenhmi an sinak dingah halnak cu June 20 ni ah tuahmi avoi 60nk Vawleicung ralzaam ni ah lamzawhnak an tuah tiah Khonumthung thanhca nih a ṭial.

Lamzawhnak ah Chin miphun cio nih aiawhmi le dirhmi Chin ralzaam kong he pehtlai in CRC hruainak in New Delhi khua Jantamantar ah June 20 ni zinglei sml 11:00am in zanlei sml 2:00pm tiang lamzawhnak an ngeih hi a si. Lamzawhnak ah hruaitu pakhat a simi CRC hruaitu Steven Ral Kap Tlaung nih, "Nihin ni hi Vawleicung Ralzaam Ni ( World Refugee Day) cu ramzakip ah tuah ciomi a si bantukin Delhi khua ah ralzaam dirhmun in khua a sami kong ah UNHCR zung, India cozah, cozah a si lomi NGOs pawl le India ram um bukip nih kan harnak hi an i fian khawhnak ding le hmailei ah kan caah biatak in rian an ṭuan khawhnak hnga halnak kan tuahmi a si," tiah a chim. Ramzakip cozah le Cozah a si lomi bu pawl nih Delhi i Kawlrammi ralzaam kong nak in Thailand le Malaysia ram ah a ummi ralzaam kong hi biapi deuh in an ruah hna ruangah kan konglam hi biapi deuh in an theihfiannak hnga tiin Delhi a phanmi ralzaam pawl nih ramthumnak kalnak kongah biatak deuh in khua an kan khan piak nak lai halnak in lamzawhnak kan ngeih hi a si tiah a chimchih. New Delhi khua Kawlram ralzaam pawl nih ramthumnak kal khawh hlan ah India ram i caan sau tuk khua an sak chung nak ah ei le din kong, fimcawnnak, ngandamnak kong pawl hi ralzaam zohkhenhtu UNHCR zung hmai ah a sikhawh chung in kan zawn an kan ruahnak lai kan duhnak kan langhter hi a si, tiah a ti.

Kawlram cozah thar a kai hnuah ramchung ral a chuah ruangah Kawlram mi ralzaam cu nikhat hnu nikhat in karh lei a panh. "Kawlram cozah thar an kai hnuah zeihmanh thlennak hmuh khawh a si rih lo, tlangcung hriamtlaibu le Kawlralkap tu i kahnak a chuak. Ralkap cozah in ralkap thilthuam i phawih in cozah thar ah an thlen nain Kawlram chungah nuhrin covo cu an buar peng ko rih.

New Delhi khua chungah nihin tiang Chin ralzaam an zate hi 11500 renglo an um lai tiah ruah a si. Asinain Delhi khua um UNHCR nih ralzaam sinak a pek cangmi hi thong 8 renglo hrawng an si kong, June 17 ni chuak Newsleaks thanhca nih a langhter. Tulio New Delhi UNHCR zung i ralzaam zatuak 14% hrawng cu rianṭuannak kongah rian kawlpiak an si i thla khat ah Rupee thong 7 in thong 8 karlak le innchungkhar 127 rian kawl piak khawhmi an si kong Burma Today nih a langhter.

2010 January in June thla tiangah Delhi UNHCR in ramthumnak ah Chin ralzaam innchungkhar 9 lawng an kal khawh ruangah hmailei ah Chin ralzaam kongah a thlihran chiatlei a panh ruangah tubantuk lamzawhnak kan tuah hi a si, tiah CRC zung rianṭuan pakhat nih a chim.—Khonumthung News.

No. 2 ramri pehtlaihnak lam kauh ding ruangah inn cheukhat ṭhialter an tong


India le Kawlram ramri pehtlaihnak lam cawhnak ding timhtuahnak a um ruangah Chin ramkulh Tedim peng i inn tam ngai cu nawlngeitu lei nih an ṭhialter hna tiah thawng theih a si.

Tedim peng Laitui khua chungah mawṭawka lam pawng i a ummi, khuami hna cu a luancia thlahnih hrawngah khan an umnak in i ṭhial ding in Chin ramkulh vuan-ci-choh Hung Ngai nih thawng a thanhmi a si, tiah Laitui khua mi pakhat nih a chim. "Vuanci-choh Hung Ngai a rak ra i lam kauh chap ding a si ruangah inn pawl hi i ṭhial ding in a rak chim hi a si. Asinain aho hmanh an i ṭhial kho lo. Nan i ṭhial lo i a voihnihnak a rat ṭhan sual ahcun khuami caah a ṭha lo tiah an ti hna ruangah cheukhat innchungkhar nih an inn pawl cu an ṭhialtak hna," tiah Laitluai khuami pakhat nih an khua i an tonmi kong cu a chim.

Chin ramkulh cozah thar nih inn aa ṭhialmi pawl cu phaisa tlawmpal pek ding in timhtuahnak an ngeih hna. "Inn ṭhial lo awk a ṭhalo mi pawl cu Kyats 50000 bawmh ding, cun ṭhial awk a ṭha lomi le inn hmun ei piakmi pawl tu cu Kyats 10000 in 20000 kar pek ding in an ti kong khua upa pakhat nih a chim," tiah Laitui khua rawl dawr ngeitu pakhat nih a chim. Atu bantuk lam kauh an timh ruangah ramri pehtlaihnak lamkam a ummi pawl kauh ding a si ruangah khua cheukhat i an inn pawl cu ṭhialter ding an si kong zong theih a si.—Khonumthung News.

Malaysia kalnak nawl an phih

Malaysia kalnak nawl thla 6 chung phih a si lai tiin riankawltu company hna nih an chim. Malaysia cozah nih phungning rianṭuannak nawl pek a timh ruang ah atubantuk an phihnak hi a si. July 1 thawk in thla 6 chung Malaysia kalnak nawl an pe ti lai lo tiin Malaysia um Mahanaan Company ṭuanvo ngei pakhat nih a chim.

“Kawlram palai zung nih thawngthanh ca a kan pek” tiah Mahanaan in Ko Myo nih a chim. Hi thla 6 chung hi company nih Malaysia ah rianṭuan kal ding an tuahmi hi Kawlram cozah nih kan cohlang hna lai lo tiin ca chung ah aa tel tiin a chimchih. Atubantuk thawng a chuah ruangah Malaysia i rianṭuan aa timmi hna sunghnak an tong kho tiin rian kawl piaktu company nih an chim. “Malaysia kal aa timmi hna nih puaisa sinah tangka an pek cia hna i, puaisa zong nih an hman chung cang. Malaysia kal a ngah lo tikah puaisa hna nih tangka an khirh kho te hna lai lo i, i hlenthawinak a chuak kho” tiah company rianṭuan pakhat nih a chim.

Thla 6 chung lam phihnak i sungh a tong dingmi ah vanlawng khualtlawnnak lei company le riankawltu company hna zong an i tel. Passport aa tlaih i vanlawng in Malaysia kal hi a cunglei (Phungning) tiah auh a si i, Thailand lei in a thlithup kal hi a tanglam (Phungninglo) tiah an auh. Tubantuk a cunglei kalnak nawl a pih caah a tanglei a kalmi an tam lai tiah an zumh. “Kawlram ah chawlehthalnak lei a har tuk caah Malaysia ah kal cio a si.

Malaysia in Kawlram a kirmi hna nih “Malaysia cu ka kal nemmam ti lai lo” an ti nain Kawlram ah rianṭuan ding a um lo caah Malaysia an rak panh ṭhan tiin Burma Campaign Malaysia ṭuanvo ngei pakhat nih a chim.

Malaysia ah Kawlram mi sing 6 hrawng an um lai tiah zumh a si i, hi chungah sing 1 hrawng lawng hi phungning te a ummi an si. Kumkhat ah minung 50000 tluk hi Malaysia ah an kal tiin BCM nih thanhnak a tuah.__ Irrawaddy

Mizoram ah Kawlrammi luhnak kong biatak in rengh an timh


India-Kawlram ramri lei Mizoram ramkulh chungah a lutmi Kawlrammi pawl cu ramri in 16 km chung lawng ah rak luhnak nawl a um kong Khonumthung thanhca nih a ṭial.

Hi kong he pehtlaiin India cunglei cozah in a voi 2nk theihternak an tuahmi a si bantuk in kan hnu January lio zongah India ramchung vuanci zung lei in Kawlrammi a bik in Chin miphun le Kawl miphun pawl cu Mizo miphun nih biatak in chekhlat nak a um lo ruangah Mizoram chungah an duhduh in an luhmi kong ah hin thinphannak an ngeih kong Indiaram thanhca Telegraph nih a langhter. Kawlrammi le Indiarammi pawl ramri 16km chung lawngah luhkhawhnak nawl a um kong le rikhiahmi ning lawng in ram hnih thil i cawkzorhnak ngeih khawh ding in thanhca nih cun a ṭial. Kawlram lei in rikhiahmi 16km leng in luh an duh sual ah cun India cozah nawlpeknak lawng in rak luhnak nawl pek ding an si lai tiah India ramchung vuanci zung lei nih ralrinnak cu an langhter. Nawl a buarmi dantatnak kongah Mizoram Superintendent of Palice le CID cu India cozah nih ṭuanvo an pek hna. Cupin ah a rak lutmi cu phungning in a luhmi an si le silo chekhlatnak zong Mizoram ramlengmi kong lei nawlngeitu nawl pek an si.

Kawlrammi a bik in Chin miphun pawl cu ramchung ah ei le din harsatnak ton ruangah Mizoram chungah hmuhmi rian paoh ṭuan in innchungkhar khuasaknak ah a hmangmi kan si. Tubantuk in ramri in 16km lawng luhnak nawl a si taktak ah cun, Kawlrammi caah cun harnak tampi kan tong lai tiah Aizawl khua um Kawlrammi pakhat nih a chim. —Khonumthung News.

Thawngbultan

* CSO sianginn hmun 6 ah sianginn a kaimi siangngakchia nih kum fatin an tuah tawnmi kum cheu camipuai cu tluangte in an lim cang. Zarhkhat chung khar a si lai. July 4, Cacawn nikhat ni in sianginn kai ṭhan a si.

* CCF hruainak in hrimhṭhan cu Gambak tiva ah an kal kho. A kal khomi minung (50) hrawng an si.

* Australia ram Tadinca minthang a simi i Journalist Mr. Tam Allard cu Malaysia Chin ralzaam kong hlaihlai ah June 23 zanlei sang ah KL a rak phan. CSO le CRC ah lennak le biaruahnak a ngei kho.

* Malaysia cozah nih Malaysia ramchungah phungning loin a ummi ramdangmi mitlaitu ah an hmanmi hna pumpek rianṭuan Rela nih mi tlaih a um ti lai lo, tiah Bernama nih a ṭial. Rela bu cu 2005 in rak dirhmi a si. Rammi nih an rianṭuan ning ah thil hmaan lo tete a um pah ti ruangah Rela cu ramlengmi tlaihnak ah an i tel ti lai lo. Rianṭuannak tbk.. ah Rela ka si i ti in an in tlaih sual hna ah cun repawt tuah khawh a si. Oparasi a um zongah Rela nih mi an tlai ti lai lo. UN card aa tlaihmi na si ko bu ah Rela nih an in tlaih sual ahcun Palik zung ah repawt tuah khawh a si. Phung ning loin a ummi ramlengmi tlaihnak kong ah Palik le immigration lawng nih an i tel cang lai.

DHS( Lah-wah-kah) nih herhmi
791 09C- 01976 Lai
791 08C- 01059 Lai
791 09C-02053 Hakha
791 09C-02930 Hakha
791 08C-02021 Hakha
791 09C- 02242 Falam
791 09C-01694 Falam
791 09C-02829 Lai
791 09C-02629 Hakha
791 09C-02030 Lai
791 10C-07162 Kalay
351 08C-02028 Hakha
791 09C- 01591 Falam

Kawl Palik nih miphun hnursawnnak bia a chim ruang, thongthlak a tong

Chin ramkulh Thangtlang khua ah a rak i ṭhial tharmi Kawl miphun palik senkhat, nih hreitlung le namte i put in, miphun hnursawnnak bia a chim ruangah Thantlang palik nih an tlaih i, Hakha thonginn ah an kuat colh tiah Thantlang um mino pakhat nih biaruahnak ah a ṭial.

June 11 ni zinglei sml 7:00 am ah hriamnam i put pah in ‘Chin — Uico pawl tiah a au i ai hrocer len, a kaa in Chin timi volhpamhnak bia lawngte a chim. Cu hnuah Pu Chan Ham inn hmai ah a kal i a angki chung namte ai chuah zau i ṭhutdan cu a sawh. A hreitlung in Pu Chan Ham ( Si-pin-hmu) inn hmai (platform) cu a tuk i a kuai dih. Pu Chan Ham cu a nupi nih inncung ah a zaamter i inn cung a phak hnuah, inncung le inntang in an i au hnawh len, tiah Thangthlang khua hlum Thawng Tin Mang nih YCCF biaruahnak ah a ṭial. Cu ti an i au khuanh tlawmpal ah Pu Chan Ham te inn hmai ummi Pu Al Cung cu a ṭang in a va nam, tiah a ti. “Hi ti thil a cannak a ruangbik cu, June 10 zan i Thantlang ah a rak tlungmi ralbawi pawl nih Pu Al Cung dawr hmai i a dir ko mi mawṭaw saikel cu ṭhial uh, an ti hna. An ti ning in an ṭhial ko nain nan ṭhial zokzok lo, ti ruangah a chuakmi a si,” tiah Thawngthawng nih cun biaruahnak ah a langhter.
Hi palik pa biachim mi kong he pehtlai in Thantlang khuanu khuapa hna, YMCA hna cu MP Lal Maung Cung hruainak in meṭing an auh i cunglei ah repawtnak ca an ṭial. Cu ruangah tubantuk Hakha thonginn ah an thlaknak hi a si.-- YCCF

Chin miphun 3 kut in AK 56 meithal phun 8 an tlaih


India ram nichuah thlanglei Makaleza ramkulh ah tuthla 18 ni ah khan Kawlrammi 3 kut in AK 56 meithal 8 an tlaih hna tiah thawng kan theih.

June 18 Zarhte ni zan sml 9:00pm hrawngah Makaleza ramkulh i khualipi Silawng khua in 15km aa hlatnak Ri Bhoi peng Ladumroi hmun chungah nawlngeitu palik nih Kawlrammi ( Chin miphun) 3 kut in AK 56 meithal 8 le kuan bawm 8 cu an tlaih hna tiah ramchuak thanhca IANS nih a langhter.

Tlaih a tongmi pawl cu LalChawisanga Zahau, 45, CL Hlira, 47 le Lallawmzuala, 34 an si i India- Kawlram ramri No. 2 pehtlaihnak lam i hrambunh Tio khua in Jeep mawṭaw in an luhpi mi a si kong theih chih a si. Hi hna nih hriamnam an phurhmi pawl cu India nichuak thlanglei i hriamnam tlaibu ULFA ( United Liberation Front of Asam) sin ah an zuar khawh ruangah tubantuk an luhpi mi hi a si, tiah ramchung thanhca nih cun a langhter. Kawlram in hriamnam phungning loin le India nichuak thlanglei hriamtlaibu pawl cu hriamnam i cawk zorhnak ah Silong khua hi biapi in an hmanmi a si kong ngiahlaitu pawl nih an zumh ning kong an langhter. June 19 ni ah India thanhca The Telegraph chungah India ram ngiahlaitu bu [ National Investigation Agency (NIA)] nih hriamnam phungning loin a zuartu kong an chimnak kong he pehtlai in CNA ralbawi hlun Tial Kulh Thang zong ai tel timi an langhtermi kong he pehtlai in Tial Kulh Thang cu aluancia kum 1993 lio ah CNA chungah zulh ding phung nawl a buar ruangah CNF/A bu chung in rak chuahmi a si kong CNF pakhat sin in theih a si. —Khonumthung News.

India le Kawlram ramri ah Jeep mawṭaw aa let, mi 8 an i hliam

India le Kawlram ramri Tio tiva pawng khua pakhat in Hakha lei ah a rak kaimi thilphur Jeep mawṭaw pakhat cu June 1 ni ah aa let i khualtlawngmi 8 an i hliam i a thi mi an um lo tiah Khonumthung thanhca nih a ṭial.

No. 2 ramri pehtlaihnak Chin ramkulh Falampeng Sanchaung khua in khualtlawngmi 18 nih an i citmi cu Hakha lei a rak kai pah, Thantlangpeng Tlanglo khua pawngah aa leh hi a si tiah ramri um pakhat nih a chim. Hma a pu mi hna cu Mizoram Champhaipeng Farkawn khua sizung ah an chiah hna i, minung 2 hi cu an i hliam ning a fah pah caah Aizawl khua lei ah an kalpi tiah a chimchih. Mah mawṭaw aa lehnak lam hi Hakha-Thantlang- ~io lam pehtlaihnak mawṭawka lam pakhat a si i, khua kiangkap a ummi mipi nih anmah tein an rak pemhmi mawṭawka lam pakhat a si.

Chin ramkulh i mawṭaw lam pawl cu Katṭaza phahmi um loin an cawhnak ning in a si ruangah furpi caan ahcun mawṭaw accident cu atu le atu ton lengmang a si. —Khonumthung News.

Tar Ngakṭah

Salai. Pingvarhoceu

Pangtar hmanthlak chungtling mirh lio
A zoh zawn ah thinlung lileng
Rawldum ṭinak coka cabuai
A hman tin te ei chung pillo
Zingzan meh ah arsa voksa
Meh phuntling zong a thaw kho lo
Hni le puan ah sui ṭhi ngun hlawn
Duh in cuai zong lung a si lo
Zingnu thluachuah tufa zatling
Mit hmai kaah um lo tuar har
Halo.'' lawng cun di a riam lo
Cawithlir locun lung a hmui lo
Tefa ruah ah zan khua adei
Tufa ruah ah chun ni atla
Ka dawt le hna nanmah locun
ka celh hrim lo khoi hme nan um
Thluachuah rosung fanu fapa
Ziahdah nan ka hawih lo nan aw a daih
Au len zong ah aw lam fak men
Tar lei mahlawng ngakṭah te bang

Kawlram ah bom a puak


Kan hnu cawn nili ah Naypyidaw le Mandalay khua hnih ah voikhat puah ah bom 2 a puak. Naypyidaw bom a puah hi chun slm 12 hrawng ah a si i, bom tha a ṭhawn tuk caah inn thlungkhuh zong a choih dih tiah Naypyidaw ummi pakhat nih a chim. Bom puah ruang ah a thimi an um le um lo fiang in theih a si rih lo. Hiti bom a puah ruangah nawlngeitu lei nih a puahnak pawnghrawng lam cu an kham dih. Atubantuk Naypyidaw bom a puah lio caan ah Mandalay khua Zechu hotel hmai ah bom a puak ve. Bom a puah ruangah mi 2 hma an pu i, a pawnghrawng inn thlalang zong an kuai dih. Meithah, palik le humhhimnaklei ṭuanvo ngei hna nih bom a puahnak pawnghrawng cu hohmanh chawhter loin an kham dih. Hi lawng si lo in Mandalay bom a puah caan tlawmpal ah Pyin Oo Lwin (Maymyo) zong ah bom a puak ṭhan. Maymyo a puakmi tu hi cu mi um lonak inn hlun ah a si i, inn a cim dih tiin Maymyo ummi pakhat nih a chim. Naypyidaw bom a puah hi atu lawng si loin kan hnu nai zong a puak cang. Bom a puah ruangah kum 35 a simi Aung Ko Latt cu nawlngeitu lei nih an tlaih.

Hiti bom a puahmi hi kanmah kan si tiin a ho hriamtlaibu hmanh nih thanhnak an tuah lo nain KNU an si lai tiin Kawlralkap nih an zumh.__Irrawaddy

Kachin nu tlaihhrem an tong


Ral an i tuk cuahmahnak hmun Kachin ramkulh chungah Kawl ralkap nih Kachin nu an tlaihhrem hna tiin Thai hrambunh nu zohkhenbu nih thanhnak a tuah. Hiti tlaihhrem a tongmi hi a tlawmbik nu 18 an si i, hi chung ah 4 an thi tiin Thai ram um Kachin nubu (KWAT) nih thanhnak a tuahmi chungah aa tel.

“Nu 25 tluk tlaihhrem an tong nain minung18 lawng kan hngalh khawhmi an si. Hi thawngpang hi pawṭa a phormi le ralkap chung ummi hna sin in kan theihmi a si” tiin KWAT chimnak nawlngei Shelly Sai nih a chim. Kawlralkap nih Kachin nu an tlaihhrem hna hi tuthla 10-18 kar ah a si i Momauk, Monyin, Mansi, Dawphonayan khua hna in an si. Tubantuk Kachin nu a tlaihhremmi hna hi keralkap 437, 237, 141, 142, 139 hna chung um rakap hna an si i, Momauk khua pakhat chung lawng ah nu 6 an tlaihhrem hna i ngakchia 7 an thah hna. KWAT nih thanhnak a tuahmi hi Kawl cozah lei in zeihmanh bialehnak an tuah rih lo. Kachin nu tlaihhrem an tonnak hmun hi Kawlralkap nih an uknak hmun a si caah hlathlainak tuah dingah a harngai tiin Kachin ramkhel lei haotu bu a simi KIO nih a chim. “Tlaihhrem a tongmi hi atu nakin an tam deuh lai. Fiang in theih khawh a si rih lo. A ruang cu khuami hmundang a zaammi an um tik ah a ho dah khua ah a tang ti theih khawh a si lo. Kan hlathlai cuahmah lio a si” tiin KIO chungṭuan nih a chim. Kachin ramkulh ah ral i tuknak le tlaihhremnak a tam caah pumpak humhimnak ca ding ah hmundang zaam ding in tuthla 16 ah Kachin mino nih khuami sinah forhfialnak ca phawtzamhnak an tuah hna.

Kawlralkap nih ral an tuknak hmun paoh ah tubantuk in nutlaihhrem hi hriamnam caah an hman tiin Nu zohkhenhbu (WLB) nih thanhnak a tuah ve. “Karen ram ah zoh u. Shan ram zong ah zoh u. Kawlralkap nih ral an tuknak hmun kip ah nu tlaihhrem hi hriamnam caah a hman” tiin WLB chungṭuan Tin Tin Nyo nih a chim. Karen Nubu (KWO) nih 2007 thanhnak a tuah ning ah; Kawl ralkap nih Karen ram chungah tlaihhrem, mi thah, hremnak le tlangrian ṭuanter tbk phung a buarmi hi 4000 leng a si tiah thanhnak a tuah. Shan Nu pehtlaihnakbu (SWAN) zong nih (1996-2002) kum 5 chungah Kawlralap nih Shan nu 625 an tlaihhrem hna tiah thanhnak a tuah. Kawlram chungah nu tlaihhrem a tamtuk caah UN nih hlathlainak tuah piak dingin Nuhrincovobu nih halnak an tuah. Europe ram hna zong nih tubantuk halnak an tuahmi hi hnatlaknak pi dingin EU sinah halnak an tuahchih. — Irrawaddy

India ramleng palai Kawlram a tlawng


India ramleng palai SM Khrishna cu kan hnu nikhat ni ah Kawlram a tlawng i president Thein Sein he ramri humhimnak le leitang meiti kong ah biaruahnak an ngei. Krishna hi nithum a caam i Kawlram ramleng palai Wana Maung Lwin he zong biaruahnak an ngei. India ramleng palai hi Kawlram a um chungah Chindwin tiva dilmi kong zong biaruahnak an ngei. Hi tidil hi electric tha peknak ding ah an dilmi a si i, India ramtang hriamtlai dohnak dingah a biapi ngaimi tidil a si. “Tidil le ramri kong lengah Tuluk nih Kawlram cung nawl a ngeihnak zong zorter dingin biaruahnak an ngei lai tiah zumh a si” tiin Dr.Tinh Swe nih a chim. Kawlram nih a ramchung chuak leitang meiti hi India zuarh lo in man tam deuh a petu Tuluk sin a zuarmi cung ah India hi Kawlram cungah a lungfak ngai tiah Dr.Tinh Swe nih a chim.

Vawleicung democracy ram nganbik a simi India hi Kawlram mipi nih duhnak langhter lio 1988 ah cun mipi lei in a dir nain 1990 hnu ah cun Asia nichuah-thlanglei ah Tuluk nawlngeihnak a ṭhan hnu in Kawlram he naih deuh in pehtlaihnak a tuah. Kawlram president Thein Sein hi India ah ramhnih pehtlaihnak ṭhanchonak ah tiin khualtlawn aa tim. 2010 zong ah ralkap lutlai Than Shwe zong India a rak tlawng. India hi Kawlram chung chawlehthal rian ṭuannak ah Tuluk, Thai, Singapore dih in India hi a palinak nganbik chawlehthal rian a ṭuanmi ram a si.__ Irrawaddy

Dollar man a ṭum, thil man a kai

Kawlram chung dollar man a ṭum ruangah chawletthal hna nih ramdang ah an zuarmi an sung dih. Hiti an sunghmi rulh khawhnak ding caah Kawlram chung an zuarmi thil man cu a hlannak a let hnih ah an kai. Tubantuk thil man a kai ruangah eidin, ṭamhmoihnak, cinthlaknak thilri hna zong a lethnih in a kai ve. Innsaknak mirang vawlei hi kan hnu nai ah cun tunkhat Ks7000 a si nain Ks 9000 ah a kai. Ramchung ramleng chawlehthal rian a ṭuanmi hna hi ramleng an zuarmi man zat ramchung ah luhpinak nawl an ngei. “Dollar man a ṭum ruangah ramleng thial a zuarmi hna cu ṭhalo lakin an sung. Ramchung rak luhpi ding zong ah zeithil hi dah tulio ah cawk an duh bik ti zong theih khawh a si lo caah harnak tamngai an tong” tiin pe caw/zuar pakhat nih a chim. Kawlram tangka thlen ah dollar man hi kumthawk ah cun Ks1000 a si nain kan hnu zarhhnih ah Ks 785 ah a ṭum. Tulio Kawlram chawlehthal umning ah ramleng zuarmi um loin ramdang in a rak lutmi lawng a um. Tuluk le Vietnam in marang non hi tambik a lut tiin 7 Golden Enterprise Ltd in ṭuanvongei pakhat nih a chim. Kawlram ah ramchung ramleng chawlehthal rian a ṭuanmi hi 4000 tluk an um. Hi hna sin in 2007 ah Kyats nuai 8000 tluk kan hmuh tiin Kawlram chawlehthal zung nih thanhnak a tuah.__Irrawaddy

Tlangcungmi Thawngtawi

Lai Kam Lian
Karen: June 5 le 7 kha Kawl ralkap nih Karen ramkulh Dooplaya pengkulh chung um khuami pawl a hramhram in thil an phurhter hna pinah Karen ralkap he an i kah ruangah nu le ngakchia hma an pu i a thih zong an thi. Thil an phurhtermi hna minung 33 lakah ngakchia 7, nu 19 le fapawi liomi 4 le nauno ngeimi pahnih an i tel. Kawl ralkap nih an kah hna caah khuami pahnih hma an pu i pakhat a thi, tiah Free Burma Rangers nih an thanh.

Karenni:
Karenni ralzaam pawl an umnak khemh ah naite June 15 ahkhan World Refugee Day an tuah chung i cu ahcun khur chungah a tlami ngakchia kum 7 a chanh khotu unau hna pahnih cu UNHCR le NGO upa pawl nih zohchun awktlak nu tiah upat peknak laksawng an pek hna. Kum 8 a simi ngakchianu belte cu an chanh manh lo caah a thi tiah Kantarawaddy Times nih a ṭial.

Mon:
All Mon Regions Democracy Party nih khuabawi kan thim tikah democracy phungning in kan thim awk a si e tiah an chim len ko nain Mudon le Chaung Zone peng ahcun USDP nih anmah duhmi an thim hna. Cozah upa hna nih khuate in an thok i khuapi deuhdeuh an kal i khuabawi an duhmi an thim thluahmah ko hna tiah khuami pakhat nih a chim tiah Mon News nih a ṭial.

Shan: Nikum le tukum karlak chung Shan ramkulh i bing cinthlaknak le bing theipar chuak a karh chin lengmang. A ruang cu cozah nih a khenkham lo pinah 2010 thimnak i a hmumi anmah minung pawl le cozah he remdaihnak a tuahtu pawl nih duh paoh in an cin i an chuah ruangah a si tiah Shan Herald nih a ṭial. June 23 ahkhan Kawl ralkap le Shan ralkap pawl an i kap hoi. A ruang cu cozah nih Shan ramkulh chungah ralkap tamchin lengmang in a kuat hna caah an i ton sualnak a tamchin tiah Shan Heralh nih a ṭial.

Rakhine: Bangladesh in tilawng in a rami minung 60 cu puaisa pawl nih Malaysia kan phan cang tiah an hlen hna i Irrawaddy Delta ah an ṭumter hna. Cu hna cu nihnih ahkhan Kawl cozah nih an tlaih hna i Bangladesh lei ah an kuat ṭhan hna tiah Narinjara nih a ṭial. Kan hnuzarh ruah a sur tuk ruangah Maungdaw khuate ummi Rohingya pawl cu an lo ah rian an ṭuan kho lo i awlokchong in an um e tiah Kaladan Press nih a ṭial.

Chelsea nih Romelu Lukaku cawk an timh


Chelsea nih Didier Drogba ai-rawlhtu ding ah tiin Adnerlecht club i an hmaikal Romelu Lukaku ( kum-18 ) cu pound 22 million in Chelsea ah caan sau pi chuih ding in cawk ding an i tim. Romelu Lukaku hi Belguim rammi a si i an ram ai-awh in kum 21 tang pumpululh chuihzuamnak ah an i rihchanh ngaimi a si. Lierse club ah kum 2004-2006 tiang a chuih i puai 68 a chuih i kawl 121 a kawl. Anderlecht club ah 2006 kum canceo in chuih hram aa thawk i kum 3 renglo a chuih i puai 93 a chuih i kawl 131 a kawl khawh. Romelu Lukaku hi Chelsea ah aa ṭhial tak lai maw ti hi Chelsea nipiah thar Villas-Boas nih biakhiahnak a tuah te lai. Villas-Boas nih hin Porto i chuihmi Falcao, Santos hmaikal Neymar le Inter Milan i a chuihmi Samuel Eto'o hna zong cawk a duh ngai hna.— Crunch Sports

Nani: Manchester United in a chuak men lai


Manchester United ṭanhtu/thazaangpetu mipi an i zohthla ngaimi pumpululh chuihthiam Nani cu Aston Villa i a chuihmi Ashley Young, Manchester United nih an cawk ruang ah a chuak men lai tiah thawngpang a leng. Arsenal ah a chuih liomi Samir Nasri zong cawk ding in Ferguson nih pehtlaihnak a tuah. Nani zong nih Real Madrih ah ṭhial a duhnak kong a chim. "Kum 2010-2011 Champion League Final Barcelona he kan chuihmi puai ah khan puai hram thawk in ka chuih lai tiah ka ruah. Nain, kan nih cu nipiah tining in a chuihmi kan si caah mi chawngtu lawng ka si ruang ah ka kaa in biachia a chuak," tiah Ferguson cung ah a lungtlinlonak a chim. Juventus, AC Milan le Inter Milan hna nih hin Nani ( kum 24) hi cawk an duh ngai. Manchester United nih hin Nani hi Inter Milan sin ah a zuar men lai tiah thawngzamhca pawl nih an ṭial.— Crunch Sports

CONCACAF Gold Cup

CONCACAF Gold Cup hi September 18, 1961 ah Mexico city ah an rak dir. CONCACAF hi a saunak in cun (the Confederation of North, Central American and Caribbean Association Football) a si i, hi pumpalulh chuihzuamnak ah aa telmi hna cu US chaklei, US Laifang le Caribbean zone leng ah US thlanglei in Guyana le Suriname, French Guiana hna an si. US hi tutan 2011 CONCACAF Gold cup inntek a si. A zuam ding hi team 12 an si. CONCACAF ah hin Mexico le US hi teinak tambik a hmumi an si. Tutan zuamnak zongah US le Mexico hi final an kai. Semi-final an chuih lio ah US nih Panama hi kawl 1-0 in a tei. Mexico nih Honduras hi 2-0 in a tei. Final hi Pasadena (California), Rose Bowl certual ah June 25 ah an chuih.__Wikipedia

Tangka tam bik hmumi Yaya Toure

Africaram chung in pumpululh chuih thiammi hna lak ah tangka hmu tambik hmumi hna Forbes Megazine nih a thim hna i mah hna lak ah cun Yaya Toure (kum 28) hi tangka hmu tam bik a si. Yaya Toure hi alai ah aa celhmi a si nain hnukham zong a thiam ngaimi a si. Barcelona i a chuih lio zong ah hnukham pawl an i hliam caan ah hnukham ah an hman tawnmi a si. Kum 2010-2011 FA Cup pumpululh chuihzuamnak ah Toure nih kawl 1 a kawlmi thawng in Manchester City nih Stoke City cu 1-0 in an tei hna i FA Cup ah pakhatnak an hmu. Africaram chung in pumpululh chuihthiam, tangka tam bik hmumi hna cu;

Min Club Min Ram min Tangka hmuh zat
1) Yaya Toure -- Manchester City / Ivory Coast : $13.3 million
2) Samuel Eto’o --Inter Milan /Cameroon : $12 million
3) Adebayor --Manchester City / Togo : $12 million
4) Kolo Toure --Manchester City / Ivory Coast : $10.3 million
5) Frederic Kanoute --Sevilla /Mali : $8.6 million
6) Didier Drogba --Chelsea /Ivory Coast : $8 million
7) John Mikel Obi-- Chelsea /Nigeria : $5.8 million
8) Michael Essien -- Chelsea /Ghana : $5.5 million —Goal.com

Secretary-General of the United Nations caah Ban Ki-moon an thimṭhan


UN General Assembly ramkip chungtel minung 192 nih Ban Ki-moon cu UN Secretary General caanhnih (term) nak ṭuanrih dingin me an pek i lungtling tein an thim chung cang. Cucaah Ban Ki-moon (kum 67) cu tuhnu kum 5 chung Secretary-General of the United Nations rian a ṭuan rih lai i 2016 ah ṭuancaan a dih te ding a si. A ralaimi December 31 ah Ban Ki-moon nih Secretary-General of the United Nations rian caankhatnak a ṭuannak dih ding a si. Ban Ki-moon nih zapi hnatlaknak in an thim ṭhanmi cu lungtho tein a cohlannak kong a chim. Thlang Korea Foreign Minister hlun zong a rak ṭuanbalmi Asia hrinsor, Korea miphun Ban Ki-moon cu 2007, January 1 ni thok in Ghana miphun Kofi Annan rian a rak chaan i Secretary-General of the United Nations rianṭuan hram a rak i thok. A luancia a rianṭuannak ah Ban Ki-moon nih vawlei cung a lumsat ning, hriamnam zorter deuh ding, nu le pa thleidannak um lo ding, himnak le daihnak rian hi thilbiapi ah a chiahmi hna an si. Cun vawlei cung hmunkip harnak a intuarmi ram ah bawmhchanhnak le thazaangpek dingin a mah Ban Ki-moon pumpak hrimhrim nih a rak tlawng leng mang hna.

Secretary-General of the United Nations rian a rak ṭuanbalmi hna:

1. Trygve Lie : Norway 1 February /1946 – 10 November 1952
2. Dag Hammarskjold : Sweden /10 April 1953 – 18 September 1961
3. U Thant : Burma /30 November 1961 – 31 December 1971
4. Kurt Waldheim : Austria /1 January 1972 – 31 December 1981
5. Javier Perez de Cuellar: Peru /1 January 1982 – 31 December 1991
6. Boutros Boutros-Ghali : Egypt /1 January 1992 – 31 December 1996
7. Kofi Annan :Ghana /1 January 1997 – 31 December 2006
8. Ban Ki-moon : S. Korea /1 January 2007 – Atu tiang

(United Kingdom rammi Gladwyn Jebb nih vawlei ralpi 2nk a rak dihhnu in Trygve Lie an rak thimhlan 24 October 1945 – 1 February 1946 tiang Secretary-General of the United Nations rian a rak ṭuan hmasabik.) __ AFP, wikipedia

Russia ram ah khualtlawng mipi phortu vanzuanglawng a tla


Russia ram, chaknitlaklei Karelia peng i a ummi Petrozavodsk pawngkam ah khualtlawng mipi phortu RusAir Tupolev 134 vanzuanglawng a tla i a puah caah minung 44 an thi i minung 8 fak ngaiin an i hliam. Aa hliammi minung 8 chungah 1 cu kumtlinglo ngakchia a si i siizung ah an thlopbul lio ah a nunnak liam. Tupolev vanzuanglawng cu khualipi Moscow i a ummi Domodedovo vanzuanglawng dinhnak hmun in aa thawh i khualtlawng minung 43 le vanzuanglawng rianṭuantu minung 9 an i tel. Khualtlawng mipi phortu Tupolev 134 cu ṭum aa timhnak lam a phak lai ah nikhua a chiattuk buin vanzuanglawng mawngtu hna nih namchan in ṭum an i timh ah tubantuk in Petrozavodsk in 2km hlatnak hmunhma dangpi ah a va tlaknak hi a si. Hi ruangah Deputy PM Sergei Ivanov nih nikhua chiat lio ah vawlei ah ṭum aa timmi vawzuanglawng mawngtu hna cu a mawhchiat hna. Karelia pengbawi Andrei Nelidov nih harnak a intuarmi chungkhar hna caah RM108,000 pek ding in bia a kamh hna. Russia hotu Dmitry Medvedev le PM Vladimir Putin nih ngaihchiatnak a tuarmi chungkhar hna sinah hramhnak bia an chim. __ AFP

Libya rambuai kong ah NATO chungtel an lung aa rual kholo

NATO nih Libya hruaitu Moammar Gaddafi ralkap cunglei raltuknak vanzuanglawng in an dohmi cungah NATO bu chungtel hruaitu upa hna an lung an i khat hna lo. Ramchung ralthawh ruangah harsatnak a tongmi hna rianrang in bawmhchanh an hauh caah cunglei vanzuanlawng in i dohrulhnak cu ngol chungrih dingin Italy Foreign Minister Franco Frattani nih cacawnnithum ni ah hal le forhfialnak a tuahmi cu FRANCE le BRITIAN ram nih an cohlang piak lo. FRANCE ram nih raltuknak kan ngol ahcun Libya hruaitu Moammar Gaddafi ralkap pawl an thazaang thawng chinnak caah timhlamhnak caan an ngei lai tiah a elmi cu BRITIAN ram nih a lungtling pi ve. __ AP, VOA

Ralhrat pawl nih Afghan palik bawi 6 an thah

Afghanistan ram, Ghazni peng ah ralhrat mibu pawl nih kalnak lam cheknak (gate) hmun pakhat ah Afghanistan palik bawi 6 a thah hna tiah hunhimnak lei chimnak nawlngeitu nih thawng an thanh. Ralhrat pawl le Afghanistan palik bawi cu meithal in an i kap. An i kah caan hi zinglei 7:00am ah a si i Afghanistan palik bawi 6 cu ralhrat pawl he an i kahnak hmun ah an nunnak a liam tiah Afghanistan intelligence agency lutlai Amir Shah nih a chim. Afghanistan palik nawlngeitu hna nih i kahnak he pehtlai in dothlatnak an tuah cuahmah lio si. __ news.com.au

Siivai thalo chuahtu, La Familia bu hruaitu an tlaih cang

Mexican palik pawl nih ramchung ah ritthaisii ṭhalo a zuar i sual chiatlei in a minthang ngaimi La Familia buhruaitu Jose de Jesus Mendez cu an tlaih khawh cang tiah hunhimnak lei biachimtu Alejandro Poire nih a chim. Ramkulh palik pawl nih Jose de Jesus Mendez an tlaihnak ah i kahnak pakhat hmanh um lo in Aguascalientes khualai ah an tlaih. La Familia bu hi Mexico ram ah thazaang a thawng ngaimi siivai ṭhalo a chuahtu bu an si i Michoacan ramkulh ah hmunhma a khuarmi an si.

Ahlan La Familia hruaitu Nazario Moreno cu a luancia December thla ah palik pawl he an i kahrulhnak ah a nunnak liam. La Familia bu nih ramkulh cozah cu a hrocer hnawh leng mang i 2008, September 15 i Mexico ram zalonhmuhnak puai sunglawi ngaiin an tuah lio ah La Familia bu nih sualnak ngeilomi minung 8 cu bom in an chehhnawh hna ruangah a rak thi. Cun July, 2009 ah La Familia bu nih palik bawi 16 cu an rak thah hna i an ruak cu lamkam ah an rak pon hna.

Tutan La Familia hruaitu Jose de Jesus Mendez an tlaihmi he pehtlai in President Felipe Caldero nih a mah pumpak Twitter chungah “tlaih kan duhbikmi misual kan tlaih khawh cang” tiah a hnangam cu a langhter. __ news.com.au

Thai nih ralzaam a tlaih leng mang ruangah UNHCR lungre a thei

A luancia zarhhnih lio ah ramchungah an nunnak him lo ruangah Thailand ram panh in duhdim dawrnak hmunhma a kawltu hna Thai cozah nih a tlaihmi hna cungah UNHCR nih thinphang lungrethei in a umnak kong a chim. Mah ram zaam tak in miram ah duhdim nunnak caah dawrnak hmunhma a kawltu hna hi ralzam an si tiah a sawsawh in ruahpiak i tlaih hi a phung si lo tiah UNHCR nih cun kan hnu cacawn nikhatni ah thawng a zamhnak ah a langhter.

An tlaihhna nak cu hmunhma 4 ah a si i dawrnak a kawltu hna cu Pakistan le Sri Lanka miphun an si. Hihna chungah a cheucu biaknak lei an zumhnak ruangah an ram Pakistan ah tlaihkhih a rak tongmi Ahmadiyah Muslim zumtu an si hna. Ralzam zohkhenhtu bu UNHCR zunginnpi nih ralzam hna Thailand nih zaangfah zawnruahnak umlo in duhpaoh in a tlaih tawn leng mang mihi ngol cang seh law ka duh tiah thawng a zamh.__ VOA

UK minthang siibawi pakhat a mah le mah aa that

WORCESTER: British ram ah an bochan ngaimi mizaw hlaithiam siibawi pakhat a mah le mah aa that timi thawngpang ruangah ngandamnak lei bukip siibawi tampi hna cu khuaruahhar launak he an khat. Mizaw hlainak khaan chungah hlaithiam siibawi pakhat a simi Alexander Reading nih palhnak hmete a tuahsual ruangah tubantuk in aa thahnak hi a si.

Fa pahnih a ngeimi Alexaner Reading cu a mawṭawka chiahnak inntling cungah hri in a rak i thlai tiah Worcester News nih thawng a zamh. Alexander Reading (kum 45) nih hlainak a tuahmi mizaw pakhat cu dam lei panh lo in a zual chinchin ruangah a mah le mah sual a phawt, keimah ruangah a si, ṭuanvo ka ngei tiah thuktuk in a ruah caah tubantuk in thil a cannak hi a si tiah Daily Telegraph thanhca nih thawng a ṭial. Alexader Reading cu British ramah an bochan ngaimi siibawi minthang pakhat a si i Spire South Bank hospital le Alexandra Hospital ah rian a ṭuanmi a si. __ news.com.au

Cafung Min1

Van Biak Thang

Samuel Langhorne Clemens ti ahcun aho hmanh nih kan thei lo nain Mark Twain2 ti tu ah cun theih dih a si. Mother Teresa3 kan ti ah cun kan theih cio nain Agnes Gonxhe Bojaxhiu ti tu cu kan thei ruam hnga loh. Ho Chi Minh4 ti ahcun theih a fawite nain Nguyen Tat Thanh ti ahcun theih a har cang. Cu bantuk ṭhiamṭhiam in, Reginald Kenneth Dwight cu aho hme si kan ti lio ah Elton John5 cu kan rak theih diam ko. Norma Jeane Mortensen le Marilyn Monroe6 zong cu ṭhiamṭhiam an si.

A cunglei minung hna kan zoh tikah biahalnak a chuak: Mark Twain cu cafung min va si kaw, Mother Teresa tah a si (lai) maw? Cun, Ho Chi Minh ti tah cafung min kan ti kho lai maw? Kan ti khawh lo ah zeidah a si kun lai?

Hi kong he pehtlai in biafang pahnih zoh hna usih: Mindeu le Cafung min. Amirang cun pseudonym7 le penname ti an si. Pseudonym timi cu lakchom asiloah serchom (fictitious name) min ti khi a si ko. Phundang chim ahcun, min ta ktak a si lomi min ti khawh zong a si. Penname timi cu cafung min ti a si ko i a sullam set cu caṭial tikah hmanmi min ti khi a si. Kan vun chap deuh ah cun, caholh lei he aa pehtlaimi ah hmanmi min a si. Mindeu (pseudonym) le cafung min cu, a muru kheh ahcun, an rak i dang ti a lang. Mother Teresa cu mindeu a si hnga i Mark Twain cu cafung min a si hnga. Cucu, a tawinak in an i dannak a langhnak cu a si.

Cafung min an hmannak a ruang hi a phunphun in a um. Bronte te-unau (Charlotte, Emily le Anne) nihcun kan mintak an kan theih ahcun ca kan ṭialmi an kan chuahpiak sual lai lo tiah cafung min Bell (Currer, Ellis le Acton) an rak hman, ti a si (Emily Bronte khi Wuthering Heights a ṭialtu kha a si). Mary Ann Evans nihcun cafung min ah pa min George Eliot a hman. Ca ka ṭialmi hi pa nih ca an ṭialmi bantukin, biatak in ka ruahpiak ve hna seh a ti, an ti. John Dickson Carr nihcun cafung min pathum (Carr Dickson, Carter Dickson, Roger Fairbairn) a hman. A ruang cu ca a ṭialmi a chuahpiaktu an i dan caah a si. Stephen King cu ṭihnung tuanbia ṭial ah minthang a si. Cafung min pahnih a ngei: tuanbia tawi ṭialnak ah a hmanmi John Swithen le tuan deuh i a rak ṭialmi cauk pawl caah Richard Bachman tiin. Mah bantuk hin midang tampi an um rih ko lai, nain minlangh/ṭhan hnu ahcun mintak hi thuh awk ah a har, ti a si.

Zei bantuk cafung min dah an i thim timi zoh tik zongah aa dang cio. Eric Arthur Blair nihcun Englandram le phunglam a uarnak langhter a duh caah cafung min George Orwell8 timi a thim, ti a si. Haiku biazai phanthiam Matsuo Basho nih cafung min 15 a rak hman bal an ti. A zultu pawl nih an rak auhnak basho timi kha a duh bik i kum 38 a si ah hi cafung min hi hman hram a thok, ti a si. Basho ti a sullam cu banhla kung tinak a si. Cafung min O. Henry9 hi William Sydney Porter i a cafung min a si i thong a tlak lio ah a rak hmuhmi min a si, an ti. A cheu nihcun minung pakhat an upatnak caah tiin upatmi mincheu kha an i lak. Pablo Neruda10 cu Chile biazai ṭialthiam Ricardo Eliecer Neftali Reyes Basualto i cafung min a si. Hi cafung min hi Czech caṭialthiam le biazai ṭialthiam Jan Neruda upatnak in a hmanmi a si, ti a si.

Cafung min hman a herh maw ti hi mi tampi nih an rak hal cio. ‘Nangmah nawl’ ti hi lehnak ṭha bik a si lai dah. Asinain, mah nawl a si khawh lo caan zong a um ve. Tahchunhnak, Carolyn Keene timi min hi Nancy Drew Mystery Series cauk a ṭialtu paoh nih hman a si. A sining cu, mah hi cauk a chuahtu kampani nih caṭialthiam a hlan hna i tuanbia a ṭialter hna. A ṭialtu cu midang a/an si ko nain a ngeitu cu a chuahtu a si i a chuahtu nih a duhmi cafungmin kha a hman. Cu bantuk cafung min cu phundang zongin auh khawh a si i house name an ti. Cun, amah le a tiluanning hman zong hi a ṭha an ti. Tahchunhnak, biazai ṭialnak i na hmanmi le duhnak tuanbia ṭialnak i na hmanmi cafung min kha pakhat si loin biazai caah biazai he aa pehtlaimi min le tuanbia caah tuanbia he aa pehtlaimi cafung min hman ahcun a ṭha deuh, ti a si. Cun, nu le pa sualnak kong tehna a ṭialmi nih anmah mintak an hmang duh lo i cafung min phunphun an hman ee, an ti fawn. Japan ceicak Sumo pawl zong nihkhin cei-min (sikhona = wrestling names) an hman dih, ti a si. A tlangpi in zoh tikah midang he asiloah zapi he rianṭuan ṭinak ah cun mah nawl a rak si khawh lo caan a um i pumpak lawng rianṭuannak belte ahcun mah nawl a si ko, ti hi a lang.

Atu lio kan cachuak zoh tikah cafung min a tam ngaingai. A bikin, biazai ṭialnak ah a lang. Hman bikmi min hi fingtlang khuaram, pangpar, vaphun, saṭil saram ti bantuk an si. Tahchunhnak, Chokhlei, Fiakfai, Lungtlaitlan, Fingrei, Dingdi, Senri, Tikhing, Tlerlung, Minmei, Zinghmuh, Vakok … (tampi um rih na’n). Cun, phundang tete zong an um len: Hehchet, Laipate, Lairam, Mikeel, Pekhnih, Rial, Netshine, Tlengtler, Phete … (tampi um len rih ko lai na’n). A cheu nih mindin (mindim) an hman ve: Aa Mang, Amen, Cerku, Elte, Sangte … (a tampi rih na’n). A cheu nih min cafang (initial) an hman: KL, L.T.V, MM, ncl, NP, PPP … (mah vial lawng ka ṭial). Min cafang le min fang a cawhmi zong um a si ṭhiam: C H Sialling, L. D Hmung, C. B Thang, C. P Lian C, Henry TC Lian … (a tampi rih). Hi min hna hmailei ahhin a cheu nih Salai, Mai, Val, Leng an chonh; a cheu nih a hnulei ah khuamin asiloah phunmin an tlaih. A cheu nih an minbing bak an hman ko.

A cunglei zoh tikah a ṭha maw ṭha lo timi biahalnak um sehlaw, ‘nangmah nawl’ ti ṭhiam hi a lehnak a si hnga. Nain, ruah ding tete an um. Khuaram pawngkam min kan hman tikah a buainak a um: ai thuat, ai khat sual kho. 1980 hrawngah Chokhlei tiin ca a rak ṭial i 2000 hnulei ah Chokhlei tiin ca a ṭial vemi an um kho. A hmasa deuh Chokhlei nih caṭial a peh ti lo ai; a hnu deuh Chokhlei nih 1980 lio ca kha a zoh ve lem lo ai (zoh awk a um lo zong a si kho fawn). An i thei veve lo. Mindin hman zongah aa thuat, aa khat kho ṭhiam. Min cafang hman zong a buai kho. Kum sau nawn hnu ah caṭialtu kha laksawng pek duh hna sehlaw, a kawlnak a fawi ti lo. Cuticun, a buainak tete an um len. Cafung min hman i timh tikahhin duhmi paoh thim khawh a si ko nain hnulei mit i au cu a herh ko ti hi a lang.

Miphun dang nih an hmanmi cafung min zoh tikahhin cafung min an si ti awk theih a har ngaingai. Mintak ah kan rel ko hna lai. Kannih kan hmanmi cafung min belte cafung min an si ti kha an lang colh. Voikhat zohnak in a lang colh; a puanlau ngai. Micheu nihcun, “Cafung min nihhin ca ṭialmi hmual a danter ngaingai,” an ti. A bikin, soiselnak lei ṭial tikah. Duhnak tuanbia tehna ṭial ahcun a poi tuk lem hnga lo, zeicatiah, caṭialtu cafung a har ahcun khakha careltu caah a hmual a si ko caah. Hi kong zong hi ‘kanmah nawl’ ṭhiamṭhiam a si ko.

Cafung min hi mintak tlukin a biapi ve. Mintak zong a pawnchuah khawh i mintak zongah a cang kho thai. Mintak thuhnak men lawngah ruah ding si lo. Mah nawl a si ai pat tiin a sawhsawh ah ruat loin ro pakhat ah chiah ding a si.

Rel Chihmi:
1. http://freelancewrite.about.com/cs/gettingstarted/a/penname.htm
2. www.wikipedia.org
3. http://www.writing-world.com/basics/pseudonym.shtml

(Endnotes)
1 Cafung min timi biafang hi Salai Zinghmuh bia a
si. Salai Zinghmuh cu Dar Lian
Uk
i a cafung min a si. Amirang cun
pennam
e asiloah
Nom De Plume
an ti.
2 Mark Twain timi hi lam hnih hrawng a saumi tilawng thuhnak in a rami a si an ti. Acheu nih, amah zu a din tuknak in an auhmi a si, an ti. A himmi ti
(safe water) tinak
pei
a si cu, a timi zong an um ve. Cafung min dang
Sieur Louis de Conte zong a ngei rih i cu min cun
Joan of Arc timi cauk
a tial.
3 Mah hi min hi Saint Teresa of
Avila
(Spanish) le
St Thé

se de Lisieux (French) upatnak in a lakmi a si.
1931 kum ah Sister Mary Teresa tiin minthlen biakamnak a tuah.
4 Hi min chung i
Ho
hi Tuluk-Vietnam (Sino-Vietnamese) phun min a si i
Chi
timi cu hmuitinh (aspiring) tinak a si i
Minh
ti cu ceuter (to light) tinak a si. Bac Ho (Uncle Ho) tiah an auh.
5
Saxophonist Elton Dean le Blues musician Long John Baldry hna upatnak in Elton John tiah mindeu a cohlan. Hlasak thiam a si pinah piano tumthiam a si i hla zong a tial fawn.
6 Marilyn timi min hi Twintieth Century Fox i rian a tuanmi pakhat nih ruahnak a
pekmi min a si.
Monroe
timi tu cu a nu minlai (
Gladys Pearl Monroe Baker) a si. Cu hna pahnih fonh cun Marilyn Monroe ti a hong chuakmi a si. Marilyn hi ngaktah in mi sinah a rak ummi a si i a pa taktak zong a thei kho thai lo, an ti.
7 Pseusodym timi cu
mindeu ti he ai khat lai. Allonym ti zong a si nain a pelte an i dang.
8 George Orwell i George hi
England
mithiang St. George min kha upatnak in a lak; a duh bikmi hmun
Suffolk
i a ummi tiva min Orwell kha a lak i cu cun George Orwell timi hi a rak chu
ak. Amah hi Kawlram zongah Indian Imperial Police (in
Burma
) a rak tuan bal. Burmese Days, A Hanging, le Shooting an Elephant ti cauk tehna khi Kawlram a um lio i a tialmi an si, an ti.
9 O. Henry timi hi a cheu nihcun an chizawh min Henry in a rami a si,
an ti. Tuanbia a tial tikah a donghnak i van mersan a thiam tuk caah
‘O. Henry Ending
’ ti tiangin chimkem bia an ngei. Richard Zatu zong nih O. Henry catialmi a leh pah tawn khi (The Gift of the Magi). Richard Zatu nih cafung min Tenglam tiin ca tial bal,
an ti (For further development of Chin State tiin Guardian Magazine, February, 1986 ah)
10 1971 kum ah Calei Nobel laksawng a hmutu a si i atu i a cafung min hi a mintak (legal name) ah a cang thai, ti a si. Amah hi Latin American biazai tialthiam minthang
a si.

Kawlpa ṭangcung I Pom Lai Cu Kan Sian ṭunglo

Thut..thut .. Hello Nan dam lio si ko lo maw? Kan ngai tuk hna. Malay ka phakka hmaisabik ka thlahlawh a si kan kuat dih hna Everet ah rak hlam te uh—thla rak ka cam piak lengmang uh mu, tiah Cungcung nih Lailei a hei chawnh hna. A chawnh khawh hna in khua a ruat …um! Malay ka phan i Lai lei nih an ka bochan tuk ti aa theih. Malaysia nih le rian hmuh a har tuk a chungkhar, a unuarual, rualchan cingla caah bochan awktlak si a duh tukmi a si fawn.’ Duhsah tein khin a thawpi a vun chuah…a khel a leh pah ah …Pa Hnawk nih aaa…zinglei 2:00 am pei a si cang hi i hngilh cang usih a vun ti. Cungcung cu rian umnak paoh ah kal in rianṭuan hram a thawk….caan cu tlaihkhawh loin tichum mei bang a liam thluahma—zeikar lo ah Cungcung lileng ngai in Malaysia a um caan zong cu kumkhat le zeimawzat a hung tling ve cang.

Nikhat cu awnem tein Chinchin nih “Ucung nang hi nangmah um piin na um nungak zong i chiah ding dawh na si cuh,” a vun ti. Cungcung cu a lau a vun i ruah pah khin aho nih cun he an ka duh lai i nangmah nih rak ka kawl piak kun tiah hmaisen nawn in a hei leh. Nikhat cu Sungai Wang lei ah bawngbi cawk ah Cungcung a kal. Dawrhmai ah Tuluk nungak tlangval an kut an i hruai i an kal khi a hei hmuh hna i an i rem tuk hna caah Cungcung lungthin phun dang piin a um. A vun dir ta, awnem tein Chinchin nih a timi bia a ruat. Cungcung lungthin chungah zeidah a um lai tiah na ruah? Cungcung cu mirhtliahmah bu tein Sunggai Wang lei ahcun...

U Cung…nungak dawhte kan hmuh piak a fel tukmi a si. Akut cung i a phan cu a vun banh i phone no. cu a vun ṭial. Phone a vun pek pah khin.. A min ah Sungku an ti khah a vun ti.. ningzah pheng ah a herh lomi hi na tuah eh a hei ti..Cu zan thok cun Sungku chawnh hram ai thok…“thut thut ..thut thut…hello” hello ….na dam lio si ko lo maw? Ho na si cu zaangfahnak tein. A ziah mah cu na ka theih te ko lai a hei ti..ka hawi le nih na kong an ka chimh lengmang, ai dawh, a fim, a fel ai zabak an ti i tlangval tampi an chawnmi lakah kei zong tuzan ka rak in chawn ve… ho na si cu vun chim ta….ahhhh…na theih te ko lai. “Nai uah ..thut...

Zarhkhat voikhat chawnh loin Cungcung a um kho lo. Sungku ton a duh a tong kho hlei lo rianṭuan cio cu a si. Phone chung lawng lawng in an i tong kho. Caan nih tichum meibang a liam bantukin Cungcung le Sungku an i komhnak a fek chin thluahmah. Zart hnih voikhat , thlakhat voikhat in Cungcung nih a hei chawnh pah tawn lengmang. Ph.. a call caan ah Sungku nih a leh peng tawnmi “ hello….ho na si cu kan theih ṭung lo tiah Sungku nih awnem tein a capo tawnmi bia”. Cungcung caah intuar zia a har ko. Nikhua caan pi cu tichum mei bang a liam thluahmah. A caan a sau ve cang Cungcung a um kho ti lo— Sungku he face to face in bia i ruah a duh. Nikhat cu Cungcung cu Sungku te dawr ah a va leng hna. “ Hello …good morning dam ma? Ei cang ma? A-ee kan put hih… “ Aaaa…a herh lomi na tuah kai lawm. Nangmah na rak kan len ah ka za cang ko.” Cungcung a lung ai hmuih kho tuk.” Biatak te…mirh nawn in Cungcung nih velhle na thiam. Cungcung hmai zoh ngam loin… Alas!! biatak ka chim ve ko mi cu. sungku bia nih Cungcung lungthin chimkhawh lo ding tiangin a tur ter. “ Sungku ka ṭin rih lai… mangṭha.” Zarh khat voikhat, zarrh hnih vuikhat in Cungcung cu Sungku sin ah a va leng pah tawn.

Nikhat cu Cungcung a um kho ti lo ṭihtuk bu le awnem tein in a vun thawk Cungcung nih. “ Sungku kan i chawnhnak zong a sau pah cang bia hmunkhat ah i ruahṭi ka duh ko— zeitik dah a caan na ka pek khawh te lai,” tiah a vun ti. Sungku a lu aa khun a holh lo, tlawmpal ah Sungku nih, “ A caan tampi rih ko cuh,” tiah a vun leh ve. Si lo.. Kan i komhnak zong a sau pah cang a caan cu na ka pek awk a si ko. Awnem tein Cungcung nih “ Si cun..kumthar zan hngah tik ah a caan ka pe te mu?” a vun ti. Sungku aa ruat…duhsah tein a lu vun sukpah khin “Aw”a vun ti. “ Vanram kai lai bang Cungcung lungthin cu..

CCF biakinn, kumthar zan hngah cu Cungcung ai ngaih tuk. Cungcung khua cuan, a hmu hlei lo. Ai chawk, hawidang mahthluk an i nuamh ah Cungcung aa nuam kho ti lo. Ziah a nuamh khawh khe lai i pasal a thim ve cangmi sinah duhdawtnak vialte ka chim dih cang lai a ti CCF biakinn kumthar zan ngah ah a bia ngaih piaktu an um ti ṭung lo. Nang si law na nuam kho ve hnga maw??? Ph a call …an aw zeihmanh an i thei kho lo. A call ṭhan ..a tlai ti lo. Zankhua nih le tlai cang. Cungcung umtu zia a thiam ti lo Mii Cho sanpioh danghmi hmanh ei zuam ti loin Cungcung innlei ah a ṭin thliahmah. Cungcung khua a ruat cang…a ziah Sungku hi cu hlan a chimmi vialte hi a velhle lawngte maw a si kun hnga. A ziah a rat khawh lo ding a si ah ṭha tein a si kho lai lo tiah a chim kun hnga lo. Va um rih seh thil poipang a ngeih ah cun a chim ko hnga lo. Din tein Cungcung a thawpi a vun chuah.— [ pehṭhan ding]

Sunday, June 26, 2011

English Exclamation – II [Mirang Palau]

vanbiakthang@chinlandguardian.com

Fianternak: Launak, lawmhnak i biachuak kan chimmi kha ‘palau (interjection)’ ti a si i cucu lungsu (exclamation mark!) he langhter a si. Cu bantuk thiamthiam sau deuh le biatlang tling deuh in kan chimmi kha lungsu (exclamation) timi a si. Tahchunhnak, ruah lo piin kan lau tuk i ‘aih!’ kan timi khi interjection a si i ‘na ka lauter tuk ah’ kan timi khi exclamation a si. Nain, hika ahcun kan cawh dih ko lai.

Bon appétit! [Enjoy your meal] = Rawl-ei ka thaw tinak

Boo
= Hnatlak lonak, duh lonak langhternak i hmanmi aw. [When Than Shwe took the podium, the crowd booed = Than Shwe nih biachimnak cung a van tikah mipi nih duh loin an au]

Bugger off [go away, get lost, fuck off] = Kan duh lo, kan hnatlak lo, kan lungtlin lo tik i ‘kal ko, um ko’ kan timi khi [Bugger off! You are joking, aren’t you? = Um ko! Naa capo sawhsawh, si ko lo ma?]

Gosh
[God] = Launak, lungthawhnak a neemnak in langhternak hmanmi biafang a si – aw, Pathin, maw Pathian tinak phun khi. [Gosh, I’d love to go to that concert! = Aw Pathian, cuka hlasak puai cu kal ka zuam laining!]

Here we go again
[here we go] = Thil kan duh lomi a can than tik i ‘aw, hitin a si than hoi ko cuh hih’ tiin lungdong in kan zai khi

Hi there = Minung pakhat he kan i ton tik, ruah lo piin kan i hmuh tik i an min kan theih tung lomi auhnak le chawnhnak ah hmanmi [Hi there, how are you? = min theih lomi hei auhnak, na dam maw?]

Jolly good = Thil pakhat khat, ruahnak pakhat kongah a tha tiin chimnak khi – a mak, a men lo si, a tha bak si tinak [Salai is back to town. Jolly good = Salai cu khua ah a kir cang – a tha tuk cu]

Long time no hear
= Na thawng ka theih lonak a sau, zeidah na lawh tinak [Salai, long time no hear! Where have you been? = Salai, thawng kan i theih lonak a sau dom! Khoika khuaram dah na phak e?]

Long time no see = Kan i hmuh lonak a sau, zeidah na lawh tinak

Lots of love
= Naihniam deuhmi le theihhngalhmi sinah cakuat le email tial tik i biadonghnak ah hmanmi biafang

My goodness
[Oh my God, goodness me] = Launak, khuaruahharnak le thinphannak ton tikah hmanmi biafang [My goodness! What a loud noise! = Elawkhei! Cu thluk thawng thanh cu!]

Never say die = Na lung dong hlah, a that thatnak a um ko lai tiin thazaang peknak ah chimmi bia

Oi [oy, yo] = Min theih lomi asiloah minung pakhat thinhan buin asiloah nihsawh nawn in auhnak; lamkam minung deuh nih hmanmi [Oi, you with the red hat - stop doing that! = Hei, lukhuh sen ai khuhmi, mah kha tuah ti hlah!]

Inn kang tuanbia (4)

Rev. Lal Pek Lian

Asinain thuk deuh in vun i kherhlai tik ah Sahngar nih hawi tamtuk a rak i ngeih manh hi theih a hung si. Miphun lak ah bia chim ngam a si ti lo. Puan tang bia hmanh tlang a au cang! ṭih a nung ko! Sahngar cu kut bengh a hun i tim chin lengmang. Inn khanghnak in a hlawk deuhmi a hun theih. Cucu mi lungthin fir kha a si. Fir a ti cang cun anih cu thlachiat a ruat lo i a biaknak zong a zuar men ko. Mi lungthin firnak ah biaknak min hoi hna a hun hman ko. Vailam tung hoi hna a rem setsai lo i a hei hau men ko. Asinain Laimi kan thinlung chung i siangbawi te nih an rak phurh mi Jesuh le a thawngṭha thlaici a si mi Lai vailamtung cu an hau kho nai sai lo.

Hi lio ah Laimi lak ahcun biathli a um kho lo tiah Sahngar cu zahphek aa zah i zu le sa he ngaknu he, bawi zia a thiam ning hmanh, chim awk ṭha lo in a um ngam. Sahngar hmanh khi a lo ti lo. Chizawh a hung si, asinain Uico nih a baoh ngam set lo mi Chizawh a hung si. A ngam chin lengmang. Cawkhnuk lawng a ding duh i mit a kem ning hi chimawk ṭha lo khi a si. Hnoh a thiam tuk hoi i rawl tiang khaih (tuh) a hau. Christmas hna tuah a duh ve tawn i Golf kaa celh ta lai i nan khrihfabu ah Xmas kan lawmhpi hna lai a ti tawn. Hmaikhah lo in Xmas hoi hna tuahpi an si tawn i lung a fak chinchin. Puantang hmanh ah lungfahnak bia chim ngam asi hlei lo. Khrihfabu hi zei nih dek fak tuk in a kar ceh tawn i a thawchuah aa harh tuk tawn ko.

Hi lio ah inn kang tuanbia cu hun philh chin lengmang a si. Ngaihchiatnak a tuarmi chungkhar hna zong philh chin lengmang an si. Asinain, inn khangtu Sahngar cu Chizawh bang a duhnak paoh ah lut chuak ngam in kan lak ah khua a sa. Chizawh he i komh thiam cu fim ngai le thil ti kho ngai ah ruah a hung si. Hi lio ah Mei-that motor zong a mit kuh a rak thaw chinchin ve i a hnar ning hmanh chim awk ṭha lo a si. Tom and Jerry carton bantuk in nun aa thapmi Zu ralṭha Jerry, Chizawh a tei tu kan herh taktak.

35. ADOLF HITLER (1889 – 1945)


Kan hnuzarh a peh>>>

British nih Germany cu thli lam in a rak tuk ah khan ṭha tuk in a rak tuk khawh caah "British Ralpuai" ti tiangin auh a rak si. Hitler nih hi tan ah hin British cu a rak tu kho lo. Hitler ralkapbuu nih cun 1941 kum April thla ah Greece le Yugoslavia zong a rak tei hna. June thla ah Russia he i tuk lo ding timi hnatlaknak kha zul duh loin Hitler nih Russia cu a rak tuk. Asinain Russia cu a rak tei lo. England le Russia kha ralram hmunhnih ser in a tuk ko hna bu ah Hitler nih US zong cu 1941 kum December thla ah ral i tuk dingin a rak zuamcawh.

1942 kum laifang hrawngah cun Germany nih cun Europe ram tam nawn kha a rak uk i ram pakhat nih ramdang hmundang tampi uk khawh cu minung tuanbia thluan ah a um tuk lomi a si. Chaklei America konṭinent ummi ram tam ngai zong a rak uk khawh hna. 1942 kum donghlei ah cun ral sining cu phundang ngaiin aa thleng. Germany cu Egypt ram El Alamein ralpuai le Russia ram Stalingrad ralpuai hna ah an rak sung. Hi an sunghnak thawkin hin German ralkapbuu pawl cu an thazaang a der chin thliahmah. German ralkap pawl cu sungh hram i thawk hna hmanh seh; Hitler tu cu tei aa rak i tim peng ṭhiam rih ko. Sungh hrim aa rak i tim lo. Sterlingrad hnu i an tukmi hna ahcun khuaruahhar ṭihnungin an rak sung nain Germany pawl cu raktuknak ah an rak i tel peng ṭhiam rih. 1945 kum furruahthawh caan lawngah ralpi cu a rak dih. Hitler cu April thla 30 ah Berlin ah amah le amah aa rak i that. A thih hnu ni sarih ah Germany cu a sung an khan.

Hitler kut chungah nawlngeihnak a sangbik a rak um lio caan ahhin minung tuanbia thluan ah philhawk ṭha lo tiangin miphun pakhat cu an phun ning in tlauter a rak i tim i a rak thah hna. Amah hi hramhram in mi uk a hmangmi a si tikah Judah miphun hna kha saram bangin a ruah hna i elhngiar ngaiin a rak thah dih hna. Vawleicung ummi Judah miphun vialte cu ka thah dih hna lai tiah mi zapi theihin a rak chim tawn. Amah chan lio ahhin Nazi pawl nih inn ngan pipi an rak sak i gas-pipe an rak bunh hna. Cu inn ngan pipi ahcun a kuttang ram hna i a ummi sualnak ngei lo Judah miphun pawl cu nu pa ti lo, tar le ngakchia ti loin an hmuhnak kaa hmun poah in an tlaih hna i saram phurhnak mawṭaw in an phurh hna i thihnak sivai khu an chuah hnawh hna i an rak thah hna. Kum tlawmpal te chungah Judah miphun 6 mil hrawng an rak thah manh hna. Judah miphun lawng hi a rak thahmi hna an rak si lo. A uknak ramchung i a ummi Russia le Gypsy miphun hna zong a rak thah hna. Ram caah ral a simi vialte hna le phun a niammi vialte hna zong a rak thah dih hna. Hi mithahnak puaipi hi amah duhin a rak chuakmi a si lo. Thichuah duhnak lungthin in timhlamh dih hnu ah a cangmi thil a si.

Hitler i a mithahnak hmun cu chawkhelrian a ṭhatbiknak hmun, tangka ngahnak hmun zong a rak si. Mithi pum in sui ha, sui kutdonghrolh tehna, mansung chawhlawn pawl phawihpiaknak kha rem tak in an rak tuah. Mithi ruak zong kha sapiat sernak ah a rak hman hna. Hitler a minthannak a ruang tampi a um. 1nk cu amah hi vawleicung misual bik a si. Nero Siangpahrang le Caligula Siangpahrang hna zong an rak sual tuk ve ko nain Hitler cu an tluk lo. Kum zabu 20 ah Hitler tuahsernak cu serhsetnak vialte lak le hremnak vialte lakah a fakbik a si tiah an phai tawn. Tuanbia ah Hitler cu ṭhatlonak leiin a minthangmi pa a si ti cu kum zabu tampi tiang a caam peng rih ko lai. Cu lawng si loin, Hitler cu Ralpi II a thawhtertu zong a rak si fawn. Hi hnu hmailei zongah Hitler cu a min a thang peng rih ko lai. A tuanbia hi khuaruahhar tuk a si. Milung a la ngaimi zong a si fawn. Germany ram chuak a si lomi ramdang miphun Hitler cu ramkhellei hmuhtonmi tlawmte lawng a ngeimi le tangka le ramkhelrian aa pehtlai lo bu ah kum 14 hrawng lawng a simi caan chungah vawleicung thazaang a ṭhawngmi ram hruaitu a rak si manh ko. Biachim holhrel a thiam tuk. A bia ngaimi poah caah a chimmi pawl tuah piak duhnak lungthin a chuahter khawh. Vawleicung tuanbia thluan ah amah bantuk in a chimmi bia ah hmual a ngeimi an um lo.

Hitler rumra a ngeihnak cu thil pahnih in zoh khawh a si rih. Pakhatnak cu Hitler i a hruainak kuttang ah a cangmi thil vialte hi amah rak um hlah sehlaw cu hi bantuk thil pawl hi tuah an rak si hnga lo. Germany le Europe ram cu Hitler caah cun a duh poah in a um khawhnak hmun le lentecelhnak hmun bantuk a rak si. 1920 in 1930 hrawng i German tampi hna lakah an cozah nih Hitler bantuk in khatte lei ki tiang a phanmi policy hna tuah ding a duh lomi an rak um ko. Asinain Hitler nih a lemsoi tik hna ah le a chimmi bia an vun theih cio tikah cun ṭhangthar mino le amah bantuk hruaitu si kho ding minung tampi nih cun a nawl ngai loin an rak um kho lo. A taktak ahcun, Hitler chan i a cangmi bantuk hi a cang takmi an si ko ti awk ah zumh a har ngaimi an si. A pahnihnak cu Nazi party a cawlcangh khawhnak ah amah pakhat lawng nih a rak hruai khawhmi hna hi khuaruahhar a si fawn. Marx, Lenin, Sterlin le a dang mi tampi cu Communist ruahnak a chuah khawhnak ding caah an rak i zuam cio hna. Asinain Socialist ruahnak a chuah khawhnak ding ahcun Hitler hlan in siseh, Hitler hnu ah siseh muihmai a cuantertu midang an rak um lo. Phundang in kan chim ahcun, Hitler hi Socialist ruahnak a chuahnak ah a biapi bik minung a rak si. Nazi Party nih nawlngeihnak an hmuh khawhnak hnga lam a rak hruai hna. Amah a bawi chung vialte a party zong cu a rak hmun ve. A thih le cangkaa Nazi Party zong cu aa ciamhpi chih ko. Amah chan lio minung hna cungah Hitler nih a ngeihmi rumra cu a ngan tuk ko nain hi hnu hmailei ahcun a tuahsernak le a rumra ngeihnak hna hi a ciam ve te ko lai. Hitler cu aa tinhmi a tlam a rak tlinh manh lo. Chanthar minung hna caah cun a tuahsernak bantuk pawl cu dohdalnak lawngte a si cang ko lai. A rak teimi le a rak laakmi hmunhma zong cu a tam ngai i a kau ngai ko nain caan tawite lawng a rak hmun. Nihin ahcun nichuahlei le nitlaklei Germany ram an pahnih fonh hmanhah amah chan lio Germany tluk a si kho ti lo. Hitler nih Judah miphun pawl cu faak ngaiin a rak ṭhio dih hna nain nawlngeihnak a ngah hnu kum 15 ahcun thongin chung hmanhah ahmasabik luatnak a hmumi ram an rak ser.

Hitler nih hin Communist he Russia he a rak huat hna. A thih ah khan amah nih a rak thawkmi raltuknak ruangah Russia nih cun Europe ram nichuahlei tiang a rak uk khawh. Vawleicung ah a huat bik mi Communist ruahnak cu a karh cho chin thluahmah leh lam. Hitler nih hin Democracy ruahnak zong a rak duh lo tuk fawn. A ci hmih dih a rak duh. Ramdang ah hi ruahnak hmang hna hlah seh ti a duh bangin Germany ca zongah a duh hlei lo. Asinain nihin ahcun nitlaklei Germany cu Democracy ram a si cang fawn. Hitler hlan chan lio i German minung pawl nakin a tu chan German pawl nih nawlngeitu uknak (aa-naa-shin uknak) cu a huat in an huat.

Amah chan lio ah hro a rak kual tluk in hmailei chan ah a rumra ngeihnak a dinhdorhning zapi cuan ṭhanṭi hna hmanh usih! Amah chan lio i thil sining tein kan tuak ahcun vawleicung ah Hitler cu rumra a rak ngeih tuk caah hi cazin chungah hin cunglei deuh ah a min khawmhawk a si hnga. Asinain Shih Huang Ti, Augustus le Genghis Khan tehna i an rumra ngeihnak cu an thih hnu kum zabu tampi tiang a rak hmun. Cucaah Hitler nakin sang deuh ah hmunhma pek an si. Napoleon le Alexander The Great hna he cun naihniam tein tahchunh khawh an si. Caantawi kan zoh ahcun Hitler cu anmah pahnih nakin vawleipi kha harnak a rak pek deuh. An rumra ngeihnak zong caan sau deuh a nguh ruangah Hitler cu hnu deuh ah ka chiahnak a si.

* The 100 A Ranking Of The Most Influential Persons In History” timi ah Machael H.Hart nih a ṭialmi chung in leh a si. Calettu: Bawicenhrang

Twitter Delicious Facebook Digg Stumbleupon Favorites More

 
halfpricemed.com