Sunday, May 22, 2011

Seihnam Sin Cakuat

Dear Pu Seihnam,
Zarhpi Zarhkhat chung rian vun ṭuan in Zarhpini phak lai hi kaa ngeih cemmi a si. Zeiruang ti ah cun Seihnam nih zeibantuk thawngpang dah na kan phurh hoi lai ti hi ka ngeih tuk tawn. Seihnam chung i rel kaa ngeih bikmi cu Seihnam sin i biahalnak hi a si. A haltu ca lawng si loin careltu ca zongah ruahnak tamtuk a kan pek. Hmailei zongah kannih Lai miphun caah a dir kho peng ding in Pathian tu nih in um pi hram hna seh. Kei zong mi halmi rel lawng cun kaa za ve ti lo. A tanglei bantukin theih ka duh ngaimi pawl kan vun hal ve;

(1) Ferguson (Man-U) coach (ni-piah) kong hi tlawmpal in na vun langhter kho hnga maw? Mah cun amah bantukin ‘Sir’ an pekmi hi teh an um maw? Zeibantuk pawl dah mah ‘Sir’ hi an pek hna?

(2) UAE ram i a ummi innsang pi kong hi a fian khawh chung in rak ka chim law ka duh ko.

(3) Asia hlasak minthang a simi Wonder Girls Group kong hi theih ka duh ngai fawn.

(4) Seihnam i Muiṭawn a ṭial tawntu Vapual hi mi ma a soi hna? Amah lawng hi ma a si? Midang Muiṭawn ṭialtu nan ngei ti lo ma? Cun, Ziah hlanlio i Seihnam ah Muiṭawn a rak ṭial tawnmi Kocik Muiṭawn pawl nan telh pah ti lo. Zeiruangahdah a si?

Lunglawmh nak he,
Robbenthawng(hp)

—————————

Dear Robbenthawng,
Tubantukin Seihnam Cazual ah biahalnak na kan tuahmi cungah kan i lawm tuk hringhran. Na halmi pawl hi theihtlei ngaingai an si. Amah belte kan cahmai nih hin na biahalnak hi a ning in langhter ahcun a tlum ding a si lo. Cucaah cun tuzarh ah Ferguson kong hi ka vun langhter i, hmaizarh Seihnam tu ah a tanglei 3 he tlamtling tein kan vun langhter ṭhan lai. Hmailei zongah tleihtlei a simi tete cu hal khawh peng a si. Kanmah Seihnam tawlreltu lei nih kan si khawh chung in phit khawh kan rak i zuam ve lai. Na theih duhning in kan in leh khawh lo sual si le kan theithiam hram te. - Seihnam


Lehnak: 1nk

Ferguson, Mipi nih an theih biknak min ah Sir Alex asiloah Fergie tiah an auhmi a si. 1941 December 31 ni ah Gavan, Glasgow ah a rak chuak i Scottish football manager zong a rak ṭuan balmi a si. Hlan a no deuh lio ahcun pumpalulh a rak chuih vemi a si. Kum 1986 in nihin ni tiang Manchester United ah manager a ṭuan liomi a si. Amah a ṭuan chungah an club cu teinak tampi le minṭhatnak an hmu. Ferguson cu East Stirlingshire le St. Mirren hna a rak hruai bal hna. Teinak taktak le hlawhtlinnak an rak hmuh hlan ah Averdeen manager zong a rak ṭuan balmi a si. Scotland National Team ah manager Jock Stein a rak thih ruangah amah Ferguson nih caan karlak chung a rak ṭuan chih i kum 1986 November thawk in tulio a ṭuannak Manchester United ah hin manager a ṭuan hi a si. Kum 24 renglo Man-U ah manager a ṭuanmi pa a si pin ah hmailei zei tiang a ṭuan rih lai timi theih khawh a si rih lo. Ferguson cu amah nih a hruaimi Man-U chungah teinak laksawng tampi zong an hmu i Manager of the Year zong British pumpalulhchuih tuanbia ah an pekmi a si.

'Sir' kan timi upatnak min hi British siangpahrang nih a pekmi 'knighthood' a hmumi nih hman a si. 1297 kum ah a hmasa bik an rak hman. Tuchan ahcun pumpak in aa zuammi tuahmi ah teinak a hmumi hna kha thim dingah min pek khawh a si. Aho paoh nih hmuh khawh a si nain British minung le British ukmi minung lawng nih 'sir' ti hi an min hmai ah an hman. Ramdangmi si ahcun an minhmai i hmang loin an min hnulei ah hmuhmi dikari ṭial bantukkhin GBE (Knight Grand Cross of the Order of the British Empire) asiloah KBE (Knight Commander of the Order of the British Empire) tiah an chiah. Nu nih an hmuh ahcun 'Dame' tiah an ti. Min auhnak i hman tikah 'phunmin' telh loin 'sakmin' lawng telh a si ruangah Sir Ferguson ti si loin Sir Alex tiah an auhnak a si.

Ferguson bantukin ‘Sir’ an pekmi hna hi an tam ngai cang. Man-U chung lawngah Sir Bobby Charlton, Sir Ryan Giggs hna hi an si. A dang hlasak minthang pawl zong nih an hmuhmi minṭhatnak a si.

0 Careltu Hmurka:

Post a Comment

Twitter Delicious Facebook Digg Stumbleupon Favorites More

 
halfpricemed.com